MASOMO YA MISA 27,OCTOBER,2023

MASOMO YA MISA 27,OCTOBER, 2023

IJUMAA, JUMA LA 29 LA MWAKA

SOMO 1
Rum. 7:18-25
Najua ya kuwa ndani yangu, yaani, ndani ya mwili wangu, halikai neno jema; kwa kuwa kutaka nataka, bali kutenda lililo jema sipati. Kwa maana lile jema nilipendalo, silitendi; bali lile baya nisilolipenda ndilo nilitendalo. Basi kama lile nisilolipenda ndilo nilitendalo, si mimi nafsi yangu nilitendaye, bali ni ile dhambi ikaayo ndani yangu.

Basi, nimeona sheria hii, ya kuwa kwangu mimi nitakaye kutenda lililo jema, lipo lililo baya. Kwa maana naifurahia sheria ya Mungu kwa utu wa ndani; lakini katika viungo vyangu naona sheria iliyo mbali, inapiga vita na ile sheria ya akili zangu, na kunifanya mateka ya ile sheria ya dhambi iliyo katika viungo vyangu.

Ole wangu, maskini mimi! Ni nani atakayeniokoa na mwili huu wa mauti? Namshukuru Mungu, kwa Yesu Kristo Bwana wetu.

WIMBO WA KATIKATI
Zab. 119:66,76-77,93-94 (K) 68

(K) Unifundishe akili na maarifa, Ee Bwana.

Unifundishe akili na maarifa,
Maana nimeyaamini maagizo yako.
Weew U mwema na mtenda mema,
Unifundishe amri zako. (K)

Nakuomba, fadhili zako ziwe faraja kwangu,
Sawasawa na ahadi yako kwa mtumishi wako.
Rehema sheria yako ni furaha yangu. (K)

Hata milele sitayasahau maagizo yako,

Maana kwa hayo umenihuisha.
Mimi ni wako, uniokoe,
Kwa maana nimejifunza mausia yako. (K)

SHANGILIO
2 Kor. 5:19
Aleluya, aleluya,
Mungu alikuwa ndani ya Kristo, akiupatanisha ulimwengu na nafsi yake, ametia ndani yetu neno la upatanisho.
Aleluya.

INJILI
Lk. 12:54-59
Yesu aliwaambia makutano pia, kila mwonapo wingu likizuka pande za magharibi mara husema, Mvua inakuja; ikawa hivyo. Na kila ivumapo kaskazi, husema, Kutakuwa na joto; na ndivyo ilivyo. Enyi wanafiki, mwajua kuutambua uso wan chi na mbingu; imekuwaje, basi, kuwa hamjui kutambua majira haya?

Na mbona ninyi wenyewe kwa nafsi zenu hamwamui yaliyo haki? Maana, unapofuatana na mshitaki wako kwenda kwa mwamuzi, hapo njiani fanya bidi kupatanishwa naye, asije akakuburuta mpaka mbele ya kadhi; yule kadhi akakutia mikononi mwake mwenye kulipiza, na yule mwenye kulipiza akakutupa gerezani. Nakuambia, Hutoki humo kamwe hata uishe kulipa senti ya mwisho.